Ngjarja e rëndë ndodhi dje në lagjen nr. 11 të qytetit të Durrësit, pranë sheshit “Pranvera”, ku një konflikt për motive të dobëta përfundoi me plagosjen e rëndë të një 70-vjeçari.
Sipas policisë, autori i dyshuar i kësaj ngjarjeje, shtetasi Arben Shtraza, 67 vjeç, banues në të njëjtën lagje, goditi me thikë shtetasin F. T., pas një debati verbal gjatë një loje domino që degjeneroi në përleshje fizike. I dëmtuari ndodhet në gjendje të rëndë nën kujdesin e mjekëve.
Pas plagosjes, autori u largua nga vendi i ngjarjes, por u kap pas disa minutash ndjekjeje intensive nga shërbimet e Komisariatit të Policisë Durrës.
Në momentin e ndalimit, 67-vjeçari kishte ende me vete mjetin prerës, i cili u sekuestrua në cilësinë e provës materiale.
Policia njoftoi se ndërhyrja e saj e menjëhershme parandaloi përshkallëzimin e mëtejshëm të situatës dhe kapjen në kohë reale të autorit.
Materialet procedurale janë referuar në Prokurorinë Durrës, për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”.
Policia vijon punën për dokumentimin e plotë ligjor të ngjarjes.
©️zërionline
