Në shumë zona rurale, djegia e mbetjeve nga banorët është ende një praktikë e zakonshme, e cila shpesh i kalon kufijtë e kontrollit dhe kthehet në rrezik serioz për mjedisin. Në përpjekje për të pastruar tokat apo për të asgjësuar mbeturinat, fermerë e banorë të fshatrave ndezin zjarre që përhapen me shpejtësi, duke djegur jo vetëm sipërfaqet e tyre, por edhe toka, pemë e vegjetacion përreth. Ky fenomen jo vetëm që dëmton natyrën dhe rrezikon jetën e njerëzve, por përbën edhe shkelje të ligjit, për të cilën gjithnjë e më shpesh po ndërhyjnë strukturat e rendit.
Dy shtetas janë proceduar penalisht pasi dyshohet se kanë ndezur zjarre në mënyrë të qëllimshme për djegien e mbeturinave, duke çuar në përhapjen e flakëve dhe djegien e sipërfaqeve toke në pronësi të tyre.
Ngjarja ka ndodhur mbrëmjen e djeshme në fshatrat Gosë e Madhe dhe Luz i Madh të Kavajës. Menjëherë pas njoftimit, shërbimet e Komisariatit të Policisë Kavajë janë nisur në vendngjarje dhe kanë ndërhyrë për ndalimin e përhapjes së zjarrit.
Nga veprimet hetimore rezultoi se autorë të dyshuar janë shtetasit R. S., 66 vjeç, banues në fshatin Gosë e Madhe dhe F. K., 70 vjeç, banues në Luz i Madh. Të dy janë proceduar penalisht në gjendje të lirë, ndërsa materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës.
Policia e Durrësit u bën apel qytetarëve që të mos ndezin zjarre në ambiente të hapura, pasi përveç rrezikut të përhapjes së flakëve dhe dëmeve të mundshme, ky veprim përbën vepër penale dhe do të ndiqet sipas ligjit.
Gjithashtu, ftohen qytetarët që të denoncojnë çdo rast të zjarrvënies apo paligjshmërisë në numrin 112, duke iu garantuar anonimatin dhe reagimin e shpejtë të Policisë.
©️zërionline
