Ritëm apo qetësi pas mesnate?! Pushuesit ndahen, por policia zbaton ligjin që e ndalon muzikën.
Policia e Kavajës ka intensifikuar kontrollet për zbatimin rigoroz të orarit të ndalimit të muzikës, me synim garantimin e qetësisë së pushuesve. Gjatë një operacioni në Golem, u konstatua se në një lokal po luhej muzikë e lartë, jashtë orarit, gjatë natës, duke shqetësuar banorët.
Shërbimet e Komisariatit të Policisë Kavajë ndërhynë menjëherë, duke ndaluar muzikën dhe sekuestruar disa pajisje që gjeneronin muzikë. Policia ka proceduar penalisht administratorin e lokalit, shtetasin E. A., 28 vjeç, si dhe shtetasin A. M., 35 vjeç, të dy nga Tirana. 35-vjeçari kundërshtoi edhe punonjësit e Policisë gjatë sekuestrimit të pajisjeve.
Materialet iu referuan Prokurorisë pranë Gjykatës së Shkallës së Parë Durrës, për veprën penale “Prishja e qetësisë publike”.
Policia e Shtetit apelon për të gjithë administratorët e lokaleve të respektojnë orarin e ndalimit të muzikës dhe inkurajon qytetarët të denoncojnë rastet e prishjes së qetësisë publike, duke garantuar ndërhyrje të menjëhershme sipas ligjit.
@zërionline
