Me mbështetjen e zonjës së parë të Francës, Brigitte Macron, në Paris është zyrtarizuar krijimi i Institutit Charcot, platforma e parë franceze dhe botërore e dedikuar ekskluzivisht kë⁸rkimit shkencor për sëmundjet neuromuskulare degjenerative, përfshirë sklerozën amiotrofike laterale (SLA), e njohur ndryshe si sëmundja e Charcot apo Lou Gehrig’s disease.
Ky institut i ri shënon një hap të rëndësishëm në fushën e neuroshkencës, duke bashkuar ekspertë ndërkombëtarë në misionin për të gjetur trajtime dhe shpresë për mijëra pacientë në mbarë botën. Mes themeluesve dhe drejtuesve kryesorë të Institutit Charcot ndodhet edhe Dr. Edor Kabashi, neuroshkencëtar shqiptar nga Durrësi, i cili prej vitesh ka arritur të bëhet një nga figurat më të njohura në kërkimin shkencor ndërkombëtar.
Nga Durrësi në qendër të kërkimit shkencor botëror
I lindur në Durrës, Edor Kabashi e nisi udhëtimin e tij shkencor jashtë Shqipërisë pas viteve ’90. Studimet universitare i kreu në Kanada, ku u diplomua dhe më pas mbrojti doktoraturën në fushën e neurobiologjisë molekulare. Eksperienca e tij kërkimore vazhdoi në Kanada dhe më pas në Francë, ku sot drejton një ekip të specializuar në Institut Imagine dhe Institut du Cerveau (ICM) në Paris, dy prej qendrave më prestigjioze në botë për kërkimin gjenetik dhe neurologjik.
Dr. Kabashi udhëheq një grup studiuesish që analizojnë mutacionet gjenetike që shkaktojnë degjenerimin e neuroneve motorike tek pacientët me SLA, duke përdorur modele biologjike si peshku zebër dhe qeliza burimore të marra nga pacientët. Synimi i tij është të kuptojë më mirë mekanizmat që çojnë në sëmundje të rënda si Charcot dhe të krijojë baza për terapi të reja të personalizuara.
Njohje ndërkombëtare dhe çmime prestigjioze
Gjatë karrierës së tij, Kabashi është vlerësuar me një sërë çmimesh ndërkombëtare, përfshirë ENCALS Young Investigators Award dhe International Medicine PG Award, që i janë dhënë për kontributin e tij në kërkimin e sëmundjes së Lou Gehrig.
Së fundmi, ai është fitues i ERC Consolidator Grant, një ndër grantet më të rëndësishme europiane që mbështet kërkimet inovative në shkencë. Ky projekt i mundëson ekipit të tij të zgjerojë kërkimin mbi gjenet që ndikojnë në zhvillimin e SLA-së dhe të testojë trajtime eksperimentale që mund të ndryshojnë rrjedhën e sëmundjes.
Krenari shqiptare me vizion global
Në prezantimin e Institutit Charcot në Paris, pjesëmarrja e Dr. Kabashit u cilësua si një prej garancive për suksesin e këtij projekti, falë përvojës së tij shumëvjeçare në kërkimet për sëmundjet neurodegjenerative.
Puna e tij është përfshirë në publikime të rëndësishme në revista shkencore si Nature Genetics, Brain dhe Neuron, ndërsa rezultatet e kërkimeve të tij kanë ndihmuar në identifikimin e disa gjeneve të reja që lidhen me sëmundjen e Charcot.
Në një intervistë për Institut Imagine, Dr. Kabashi theksoi se bashkimi i ekspertizës klinike me kërkimin gjenetik është thelbësor për të afruar shkencën me pacientin. Ai shpreh gjithashtu dëshirën për të krijuar ura bashkëpunimi me institucione shqiptare në të ardhmen, në mënyrë që përvoja e fituar në laboratorët europianë të ndihmojë në ngritjen e kapaciteteve kërkimore edhe në Shqipëri.
Dr. Edor Kabashi është sot një nga figurat më përfaqësuese të shkencës shqiptare në botë, shembull i përkushtimit dhe vizionit që tejkalon kufijtë, duke e bërë Durrësin dhe Shqipërinë pjesë të hartës globale të kërkimit shkencor shëndetin dhe jetën.
©️zërionline
