Një aksident rrugor ka ndodhur pasditën e sotme, rreth orës 14:00, në aksin Fier–Patos, ku dy automjete janë përplasur duke shkaktuar tre të lënduar. Ngjarja u regjistrua në momentin kur një automjet i policisë, që udhëtonte në drejtim të kundërt me një mjet tip “Benz”, u përfshi në përplasje.
Si pasojë, dy efektivë të Komisariatit të Policisë Fier, që ndodheshin në automjetin e shërbimit, si dhe drejtuesja e makinës tjetër, shtetasja M.H. kanë marrë lëndime dhe janë transportuar menjëherë drejt spitalit për të marrë ndihmën e nevojshme mjekësore. Të tre ndodhen nën kujdesin e bluzave të bardha, jashtë rrezikut për jetën.
Rrethanat e plota të aksidentit nuk janë bërë ende të ditura. Sipas të dhënave paraprake nga policia vendore, dyshohet se drejtuesja e Benzit ka humbur kontrollin në drejtim dhe u përplas me mjetin e policisë, por nga dëmtimet e automjeteve është e vështirë të përcaktohet kaq shpejt përgjegjësia e aksidentit. Hetimet për përcaktimin e shkaqeve dhe dinamikës së saktë të ngjarjes vijojnë.
