Gjendja e përgjithshme e 15-vjeçarit, i cili u plagos rëndë dy ditë më parë nga bashkëmoshatari i tij në Durrës, paraqitet e qëndrueshme, por ai vijon të qëndrojë i intubuar në repartin e reanimacionit. Mjekët e spitalit të Durrësit bëjnë me dije se adoleshenti po mbahet nën monitorim të rreptë në reanimacion, ndërsa shpresojnë që në orët në vijim të jetë e mundur dalja e tij nga intubimi, nëse gjendja e tij vazhdon të përmirësohet.
Ndërkohë, në Gjykatën e Durrësit pritet të zhvillohet seanca për caktimin e masës së sigurisë ndaj 14-vjeçarit, autorit të dyshuar të plagosjes së rëndë me thikë. Ngjarja e rëndë, e shkaktuar për motive të dobëta mes adoleshentëve, ka tronditur opinionin publik dhe ka ngritur sërish shqetësimin mbi konfliktet mes të miturve dhe përdorimin e armëve të ftohta.
Në seancën e sotme, Prokuroria pritet të kërkojë masën më të rëndë të sigurisë për të miturin e dyshuar, ndërsa procesi po zhvillohet me dyer të mbyllura, sipas procedurave që parashikon ligji për të miturit.
©️zërionline
