Protestat në Iran kanë hyrë në ditën e pestë, të shoqëruara dhe me përplasje të dhunshme mes qytetarëve dhe forcave të sigurisë në disa qytete të vendit. Demonstrata janë shënuar në Teheran dhe në qytete të tjera si Lordegan, Marvdasht, Kermanshah, Delfan dhe Arak.
Në qytetin Lordegan, në provincën Chaharmahal dhe Bakhtiari, qytetarët dolën në protesta që në orët e para të mëngjesit, duke brohoritur slogane kundër regjimit. Sipas raportimeve, forcat e sigurisë ndërhynë me dhunë, duke përdorur edhe zjarr të drejtpërdrejtë ndaj protestuesve. Të paktën dy persona humbën jetën dhe disa të tjerë u plagosën. Agjencia e lajmeve Fars raportoi për dëme të mëdha në ndërtesa shtetërore dhe institucione publike, përfshirë zyrën e guvernatorit, bashkinë, gjyqësorin dhe disa banka.
Në Teheran, shitësit e frutave dhe perimeve në tregun e Distriktit 19 organizuan një tubim dhe marshim, duke bërë thirrje për vazhdimin e grevës. Forcat e Sigurisë Shtetërore përdorën gaz lotsjellës për të shpërndarë turmën, gjë që solli përplasje mes palëve.
Protesta u shënuan edhe në Marvdasht, ku qytetarët u mblodhën në Rrugën Enghelab. Forcat e rendit përdorën topa uji për të shpërndarë demonstruesit, ndërsa protestuesit vijuan marshimin me slogane kundër udhëheqjes politike. Gjatë përplasjeve, një automjet i forcave të sigurisë u dogj.
Në Kermanshah, demonstrata masive u zhvilluan në disa zona të qytetit, me turma që marshuan drejt Sheshit Azadi. Përplasje u raportuan edhe aty mes qytetarëve dhe forcave të sigurisë, ndërsa thirrje kundër autoriteteve u dëgjuan gjatë gjithë protestës.
Situata në Iran mbetet e tensionuar, ndërsa autoritetet nuk kanë dhënë ende një bilanc zyrtar të plotë për viktimat dhe të plagosurit nga përplasjet e ditëve të fundit.
