Muzeu i Artit Modern në Paris, Musée d’Art Moderne de Paris, ka përfituar një dhuratë të përshkruar si “jashtëzakonisht bujare”: 61 vepra të Henri Matisse, të cilat deri më tani ishin ruajtur brenda familjes së artistit.
Pjesa më e madhe e koleksionit të dhuruar – që përfshin piktura, vizatime, gravura, litografi dhe një skulpturë – paraqet vajzën e piktorit, Marguerite, subjektin e tij të preferuar. Dhurata, e cilësuar nga muzeu si e jashtëzakonshme dhe historike, është bërë nga Barbara Dauphin Duthuit, bashkëshortja e nipit të Matisse, Claude, i cili u nda nga jeta në vitin 2011 në Nju Jork.
Shumë nga këto vepra ishin huazuar më herët për ekspozitën “Matisse et Marguerite” të mbajtur vitin e kaluar në MAM, por drejtuesit e muzeut thanë se vendimi i Duthuit për t’i lënë përgjithmonë në koleksion ishte një surprizë e plotë. Në vitin 2013, Duthuit i dhuroi Centre Pompidou pikturën “Marguerite with a Black Cat”, një nga portretet më të njohura të vajzës së Matisse.
Marguerite lindi nga marrëdhënia e Matisse me një nga modelet e tij, Caroline Joblau, gjatë kohës kur ai studionte art në Paris. Artisti e njohu vajzën dhe, pas martesës katër vjet më vonë, e solli të jetonte me familjen e tij të re, përfshirë gjysmëvëllezërit Jean dhe Pierre.
Në moshën gjashtëvjeçare, Marguerite u prek nga difteria dhe iu nënshtrua një trakeotomie urgjente. Për shumë vite ajo e fshehu shenjën në qafë me bluza me jakë të lartë ose fjongo, siç shihet edhe në portrete, deri sa iu nënshtrua një operacioni korrigjues në moshën 26-vjeçare.
Megjithëse shëndeti i saj mbeti i brishtë, gjatë Luftës së Dytë Botërore Marguerite iu bashkua rezistencës franceze, u torturua nga Gestapo dhe u kërcënua me deportim në një kamp përqendrimi nazist. Ajo kishte nisur të pikturonte dhe mori pjesë në ekspozita kolektive gjatë luftës, por më pas hoqi dorë për t’iu përkushtuar rolit të asistentes dhe agjentes së të atit deri në vdekjen e tij, në moshën 84-vjeçare, në nëntor 1954. Marguerite vazhdoi katalogimin e veprës së Matisse deri në vdekjen e saj në Paris, në vitin 1982, në moshën 87-vjeçare.
Drejtori i MAM, Fabrice Hergott, i përshkroi portretet e Marguerite si “jashtëzakonisht të bukura dhe prekëse”, duke theksuar se ky gjest dëshmon besimin e thellë të zonjës Duthuit ndaj muzeut, i cili “bëhet shtëpia e re e Marguerite për dekadat dhe shekujt që vijnë”.
Fakti që Matisse preferonte t’i mbante veprat brenda familjes dhe jo t’i shiste e bën këtë dhuratë edhe më domethënëse. 61 veprat e reja i bashkohen 20 veprave të Matisse që muzeu i zotëronte tashmë./ The Guardian
