Një i paraburgosur ka ndërruar jetë këtë fundjavë në burgun e Shkodrës. Viktima është identifikuar si Nicolae Ionnut Erion Deliver, 20 vjeç, me origjinë nga Rumania dhe banues në Shkodër. Sipas të dhënave paraprake, i riu u gjet në gjendje të rënduar shëndetësore brenda ambienteve të institucionit të vuajtjes së dënimit, nga ku u dërgua në Spitalin e Koplikut, si më i afërti, ku mjeku i urgjencës konstatoi vdekjen e tij.
Drejtoria e Burgjeve bëri me dije se gjatë paradites së sotme, 20-vjeçari është konstatuar nga personeli i shërbimit duke qëndruar në shtrat, gjë që solli njoftimin e menjëhershëm të stafit shëndetësor të institucionit. Pas vlerësimit mjekësor, atij iu konstatuan parametra jetësorë të ulët, u dha ndihma e parë dhe u vendos transportimi i menjëhershëm drejt urgjencës së spitalit, por pa mundur të mbijetojë.
Nicolae Ionnut Erion Deliver ishte arrestuar në tetor të vitit 2024 për veprat penale “vjedhje me dhunë” dhe “prodhim dhe shitje të lëndëve narkotike” dhe që nga 10 tetori i vitit 2024 ndodhej në IEVP Shkodër pasi gjykata kishte vendosur masën e sigurisë “arrest në burg” për të. Autoritetet kanë nisur verifikimet për të sqaruar rrethanat e plota të ngjarjes, ndërsa pritet edhe raporti mjeko-ligjor për përcaktimin e shkakut të saktë të vdekjes.
Pritet ekspertiza mjeko-ligjore për të përcaktuar shkakun e vdekjes, si dhe hetimet për të kuptuar çfarë e çoi të riun drejt vdekjes dhe rolin e punonjësve në shërbim.
