Një konflikt i çastit i shndërruar në dhunë fizike dhe dëmtim prone ka çuar në ndërhyrjen e Policisë në Durrës, duke vënë në lëvizje strukturat hetimore dhe Prokurorinë.
Specialistët për Hetimin e Krimeve të Komisariatit të Policisë Durrës kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Durrës, për veprat penale “Plagosje e lehtë me dashje” dhe “Shkatërrimi i pronës”, të kryera në bashkëpunim, ndaj shtetasit A. Z., 44 vjeç, banues në lagjen nr. 14, Nishtulla.
Në të njëjtën kohë, janë shpallur në kërkim edhe shtetasit S. Z., 46 vjeç, dhe V. R., 37 vjeç, të dy banues në të njëjtën lagje.
Sipas hetimeve, të premten, rreth orës 17:30, në lagjen nr. 14, Nishtulla, pas një sherri për motive të dobëta, tre shtetasit, në bashkëpunim me njëri-tjetrin, kanë goditur me grushte shtetasit F. M., 55 vjeç, dhe L. M., 55 vjeçe. Po ashtu, gjatë konfliktit është dëmtuar edhe një automjet tip “Ford Focus”, duke u thyer xhamat e derës së shoferit dhe të pasagjerit, në pronësi të shtetasit L. M., 47 vjeç.
Policia bën me dije se vijon puna intensive për lokalizimin dhe kapjen e dy shtetasve të shpallur në kërkim, si dhe për dokumentimin e plotë ligjor të ngjarjes.
©️zërionline
