Ish-presidentja e Republikës së Kosovës, Atifete Jahjaga, ka reaguar publikisht ndaj raportimeve mediatike që e lidhin emrin e saj me dosjen e njohur si “Epstein”, duke i cilësuar ato si tërësisht të pabaza dhe të pavërteta.
Në sqarimin e saj, Jahjaga thekson se gjatë ushtrimit të detyrës si Presidente e Republikës së Kosovës nuk ka pasur asnjëherë njohje, takim apo çfarëdo lloj kontakti me personin në fjalë. Ajo sqaron se përmendja e emrit të saj në disa media lidhet vetëm me një korrespondencë elektronike të palëve të treta, e cila, sipas saj, nuk përbën dhe nuk dëshmon asnjë takim, njohje apo lidhje personale me të.
Sipas ish-presidentes, emri i saj nuk figuron askund në dokumentet e publikuara së fundmi. Në emailin e përmendur nga palët e treta, përmendet vetëm “Presidenti i Kosovës”, pa u specifikuar se për cilin president bëhet fjalë, si dhe pa ekzistuar ndonjë kërkesë për takim në emër të saj apo të ndonjë presidenti tjetër.
“Çdo raportim ndryshe është insinuatë dhe mashtrim i opinionit publik, gjë që mund të vërehet lehtësisht nga dokumentet e publikuara”, thekson Jahjaga në reagimin e saj.
Ajo thekson se nuk e ka njohur, nuk e ka takuar dhe nuk ka kërkuar kurrë takim me personin në fjalë, në asnjë nga pozicionet që ka mbajtur deri më tani.
©️zërionline
