Mendja dhe zemra janë të lidhura përmes një aksi të jashtëzakonshëm komunikimi dhe, pas një infarkti, truri aktivizon lidhje specifike nervore për të përshpejtuar rigjenerimin e zemrës. Ky është përfundimi i një studimi të realizuar nga University of California, San Diego dhe i publikuar në revistën shkencore Cell.
Zbulimi konsiderohet i rëndësishëm, pasi mund të hapë rrugën për zhvillimin e terapive dhe metodave të reja të trajtimit për pacientët që kanë pësuar atak kardiak.
Prej kohësh dihet se zemra dhe truri nuk funksionojnë të izoluar, por komunikojnë vazhdimisht me njëri-tjetrin. Ata bashkëpunojnë në procese jetike si rregullimi i presionit arterial apo kontrolli i gjendjeve të të fikëtit. Ky komunikim realizohet përmes neuroneve sensoriale, të cilat perceptojnë edhe luhatjet më të vogla në funksionimin e zemrës.
Gjatë eksperimenteve, studiuesit identifikuan një grup të panjohur më parë neuronesh sensoriale që burojnë nga një nerv i rëndësishëm, i cili lidh trurin me zemrën, aparatin tretës dhe mushkëritë. Në momentin kur zemra pësonte dëmtim, u vu re një rritje e ndjeshme e fibrave nervore përreth saj, çka sugjeron se truri aktivizon mekanizma të posaçëm për të mbështetur procesin e rikuperimit.
Ky zbulim forcon idenë se lidhja mes trurit dhe zemrës është shumë më dinamike nga sa mendohej më parë dhe mund të shërbejë si bazë për trajtime inovative në të ardhmen.
©️zërionline
