Pas emërimit të Pirro Vëngut në postin e ministrit të Mbrojtjes, në krye të Autoritetit Portual Durrës është vendosur Kreshnik Bajraktari, i cili ka mbajtur më parë postin e këshilltarit në Ministrinë e Infrastrukturës dhe Energjisë. Ai konsiderohet me përvojë të gjatë në fushën e transporteve dhe ka drejtuar për 8 vite qendrën e trafikut urban në kryeqytet. Bajraktari ka përfunduar studimet në Universitetin Politeknik të Tiranës.
Gjatë vitit të fundit, periudha 2023-2024, ai ka punuar si inxhinier i Sistemeve të Sinjalizimit dhe Komandë-Kontrollit pranë Hekurudhës Shqiptare. Deklarohet njohës shumë i mirë i gjuhës angleze dhe asaj italiane. Këshilli Drejtues i APD-së vendosi emërimin e Bajraktarit në postin e drejtorit të përgjithshëm pas propozimit të ministrit të Infrastrukturës dhe Energjisë.
Ndërkohë pas emërimit të Petrit Malaj Ministër i Financave, në krye të Agjencisë Kombëtare të Burimeve Natyrore, është vendosur Erlind Sulo, i cili prej pak muajsh drejtonte Korporatën Elektroenergjetike Shqiptare.
Pas emërimit të Ervin Hoxhës Ministër i Brendshëm, në krye të Inspektoratit Kombëtar për Mbrojtjen e Territorit është rikthyer Dallëndyshe Bici. Vendin e lënë vakant nga Bici në drejtimin e Agjencisë Shtetërore të Kadastrës, e ka zënë Lorena Goxhobelli, e cila pas disa detyrave të rëndësishme në administratën publike, prej qershorit 2022 shërbente si këshilltare e jashtme ligjore për pronësinë në kabinetin e ministrit të Mbrojtjes.
@zërionline
