Në orët e para të mëngjesit, besimtarët myslimanë në Durrës iu drejtuan xhamive për të kremtuar Fitër Bajrami, festën që shënon mbarimin e muajit të shenjtë të Ramazanit.
Qindra qytetarë u mblodhën në xhaminë e madhe të qytetit, në sheshin përpara saj, si edhe në xhamitë e tjera, për të falur namazin e kësaj dite të shënuar, në një atmosferë përulësie dhe bashkimi shpirtëror.
Në mesazhin e tij, imami Ervin Qylafku uroi besimtarët që Zoti t’u ketë pranuar agjërimin, lutjet dhe çdo vepër të mirë. Ai theksoi gjithashtu rëndësinë e qëndrimit larg veseve që dëmtojnë individin dhe shoqërinë, duke përmendur edhe korrupsionin si një plagë që duhet luftuar përmes ndershmërisë dhe përgjegjësisë.
Imami bëri thirrje që besimtarët të ndjekin sa më shumë shembullin e profetëve, duke jetuar me drejtësi, përulësi dhe përkushtim ndaj së mirës.
Pas faljes, besimtarët shkëmbyen urime dhe përqafime, ndërsa gjatë ditës vijojnë vizitat në familje dhe të afërm. Kjo festë, përtej dimensionit fetar, mbetet një moment i rëndësishëm reflektimi dhe afrimi njerëzor, ku vlerat e besimit dhe solidaritetit marrin një kuptim më të thellë.
©️zërionline
