Vijojnë goditjet e Policisë kundër veprimtarisë kriminale në fushën e narkotikëve në qytetin e Durrësit. Një operacion i koduar “Coast” ka çuar në prangosjen e një 22-vjeçari të dyshuar për shpërndarje kokaine.
Sipas burimeve zyrtare, specialistët e Seksionit për Hetimin e Narkotikëve, mbi bazën e informacioneve të siguruara në rrugë operative, organizuan ndërhyrjen për kapjen në flagrancë të shtetasit që dyshohej se merrej me shpërndarjen e lëndëve narkotike.
Në bashkëpunim me Forcën e Posaçme Operacionale të Drejtorisë Vendore të Policisë Durrës, u bë e mundur finalizimi i operacionit në lagjen nr. 17, ku u arrestua shtetasi G. R., 22 vjeç. Gjatë kontrollit fizik, në çantën e tij u gjet një sasi lënde e dyshuar narkotike, e llojit kokainë. Një tjetër sasi u zbulua edhe në banesën e tij.
Në total, policia sekuestroi rreth 188.5 gramë lëndë të dyshuar kokainë, e cila dyshohet se ishte e destinuar për shpërndarje në qytet.
Në kuadër të operacionit u procedua penalisht edhe shtetasi L. Gj., 21 vjeç, i cili ndodhej me të arrestuarin. Gjatë kontrollit fizik, atij iu gjet një mjet prerës (thikë), që u sekuestrua si provë materiale.
Policia bën me dije se vijon puna për identifikimin e personave të tjerë që mund të jenë të përfshirë në këtë aktivitet kriminal, ndërsa materialet procedurale i janë referuar Prokurorisë së Durrësit për veprime të mëtejshme.
©️zërionline
