Një ngjarje e rëndë është shënuar mbrëmjen e sotme në Ksamil, ku një i ri 22-vjeçar ka humbur jetën pas një aksidenti në det.
Sipas informacionit paraprak të policisë, rreth orës 18:30, shtetasi Albiano Kreçi, banues në Ksamil, duke lundruar me një mjet tip jet ski, dyshohet se është përplasur me një skaf të Policisë Kufitare, i cili ndodhej i stacionuar, i ndaluar rreth 400 metra larg bregut në kuadër të monitorimit të hapësirës detare.
Përplasja rezultoi fatale për të riun. Menjëherë pas ngjarjes, punonjësit e Policisë Kufitare, së bashku me drejtues të tjerë mjetesh lundruese që ndodheshin në zonë, e nxorën nga deti dhe e transportuan me urgjencë drejt spitalit. Megjithatë, për shkak të plagëve të marra, 22-vjeçari nuk mundi të mbijetojë.
Në vendngjarje është ngritur një grup i posaçëm hetimor, ndërsa në bashkëpunim me Agjencinë e Mbikëqyrjes Policore dhe nën drejtimin e Prokurorisë po kryhen veprimet e nevojshme për zbardhjen e plotë të rrethanave dhe shkaqeve të aksidentit tragjik.
©ZëriOnline
