Një operacion i zhvilluar në Portin e Durrësit ka zbuluar një sasi të konsiderueshme cigaresh që dyshohet se po tentoheshin të futeshin kontrabandë në vend. Gjatë aksionit të koduar “Trageti”, autoritetet sekuestruan 798 steka cigare, ndërsa një person përfundoi në pranga dhe një tjetër u procedua penalisht.
Sipas burimeve zyrtare, fillimisht u ndalua për kontroll një automjet që sapo kishte mbërritur me traget. Në brendësi të tij u gjetën 548 steka cigare pa pullë fiskale dhe pa dokumentacionin përkatës, të cilat dyshohet se synonin t’i shmangeshin procedurave doganore.
Hetimet nuk u ndalën me kaq. Gjatë kontrollit të banesës së drejtuesit të automjetit, policia zbuloi dhe sekuestroi një armë zjarri automatike tip AK-47, duke rënduar më tej pozitën e tij ligjore.
Në vijim të operacionit, kontrollet u shtrinë edhe në ambientet e një trageti, ku në sektorin e hotelerisë u gjetën të fshehura edhe 250 steka të tjera cigare. Për këtë rast nisi procedimi penal ndaj përgjegjësit të hotelerisë, i dyshuar për përfshirje në aktivitetin e kontrabandës.
Në total, nga operacioni u sekuestruan 798 steka cigare, një armë automatike, një automjet dhe dy telefona celularë, ndërsa hetimet vijojnë për të zbuluar nëse pas kësaj skeme fshihet një rrjet më i gjerë i kontrabandës së mallrave që i nënshtrohen akcizës.
©ZëriOnline
