Një aksident i rëndë automobilistik ka ndodhur këtë të shtunë në kilometrat e fundit të autostradës “Ibrahim Rugova”, pranë pikës kufitare të Morinës, ku janë përfshirë 6-7 automjete. Si pasojë e përplasjes, shtatë persona raportohet paraprakisht se kanë mbetur të lënduar.
Sipas informacioneve të para nga vendi i ngjarjes, mes të lënduarve ndodhen edhe një fëmijë dhe një grua shtatzënë.
Të lënduarit janë transportuar me autoambulanca në Spitalin Rajonal të Prizrenit, ku po marrin trajtimin e nevojshëm mjekësor. Deri më tani nuk raportohet për viktima, ndërsa autoritetet ende nuk kanë bërë të ditur gjendjen shëndetësore të të lënduarve.
Në vendngjarje ndodhet Policia e Kosovës dhe ekipet e emergjencës, të cilat kanë ndërhyrë për t’u ardhur në ndihmë të lënduarve dhe menaxhuar situatën.
Për shkak të aksidentit, njëra korsi e autostradës në drejtimin Prizren-Morinë është bllokuar, duke shkaktuar kolona të gjata automjetesh dhe vonesa në qarkullim. Policia po e orienton trafikun dhe u bën thirrje qytetarëve që, nëse kanë mundësi, të shmangin këtë segment ose të respektojnë udhëzimet e zyrtarëve në terren.
Shkaqet e aksidentit mbeten ende të paqarta. Policia e Kosovës pritet të japë më shumë detaje pas përfundimit të hetimeve.
