Një aksident tragjik është regjistruar pasditen e sotme në Shkodër, ku një 67-vjeçare ka humbur jetën pasi është përplasur nga një automjet.
Ngjarja ndodhi rreth orës 15:40, në vendin e quajtur “Ura e Bahçallëkut”. Një 27-vjeçare, e cila drejtonte automjetin, dyshohet se ka humbur kontrollin mbi drejtimin e tij. Makina ka dalë nga rruga dhe është përplasur me shkallët metalike të një ndërtese, duke goditur këmbësoren që po lëvizte në trotuar.
Përplasja rezultoi fatale për 67-vjeçaren, shtetasen E. B., e cila humbi jetën në vendngjarje.
Grupi hetimor ndodhet në vendin e aksidentit dhe po punon për të zbardhur rrethanat dhe përcaktuar shkaqet e kësaj ngjarjeje tragjike.
