Një jaht luksoz i miliarderit kinez Richard Liu ka mbërritur në portin e Durrësit, për t’u furnizuar me karburant. Ky furnizim pritet të sjellë të ardhura të menjëhershme për ekonominë dhe buxhetin e shtetit.
Bëhet fjalë për M/Y “Deep Blue”, një nga jahtet më të reja të ndërtuara nga kompania gjermane Lürssen gjatë vitit 2026, 134 metra i gjatë, me vlerë të raportuar rreth 450 milionë dollarë. Superjahti lundron nën flamurin e Ishujve Kajman dhe pronar i tij raportohet të jetë miliarderi kinez Richard Liu, themelues dhe drejtues i kompanisë së njohur të tregtisë elektronike JD.com.
Në portin e Durrësit, “Deep Blue” po furnizohet me rreth 300 mijë litra naftë. Çmimi për anijet turistike është 1.4 euro për litër, ku 1 euro përfaqëson vlerën e karburantit në bursë, ndërsa 0.4 euro për litër shkon si taksë luksi në favor të shtetit shqiptar.
Vetëm nga ky furnizim, buxheti i shtetit përfiton rreth 120 mijë euro, duke treguar potencialin ekonomik që sjell shërbimi i jahteve dhe anijeve turistike në portet shqiptare.
Mbërritja e superjahteve të kësaj kategorie po e shndërron Durrësin në një pikë të rëndësishme të furnizimit detar në Adriatik, duke krijuar të ardhura jo vetëm për operatorët portualë, por edhe për financat publike. Gjithsesi duhet pranuar që nafta për këto anije kushton 1 euro në Mal të Zi, duke marrë një pjesë të mirë të tregut.
©ZëriOnline
