Një shtetas i dënuar në Kosovë me 3 vjet e 6 muaj burgim kapet në Durrës duke pushuar në plazh.
Si rezultat i informacioneve të siguruara në rrugë operative dhe i veprimeve të shpejta policore, policia njoftoi se specialistët e Seksionit për Mbështetjen Operacionale të Hetimit, pranë DVP Durrës, finalizuan operacionin policor të koduar “Wanted 38”.
Në kuadër të operacionit, në lagjen nr. 13, Plazh Durrës, u lokalizua dhe u arrestua provizorisht, me qëllim ekstradimi, shtetasi Enver Zhjeqi 57 vjeç, lindur në Kosovë.
Ky shtetas ishte shpallur në kërkim, pasi Gjykata e Prishtinës, Kosovë, e ka dënuar me 3 vjet e 6 muaj burgim, për veprat penale “Falsifikimi i dokumenteve” dhe “Mashtrimi”, të parashikuara nga legjislacioni penal i Kosovës.
Interpol Tirana, në bashkëpunim me autoritetet homologe të Kosovës, vijon procedurat për ekstradimin e këtij shtetasi.
©ZëriOnline
