Edhe pse tetori po mbyllet, turistët vijojnë të jenë të shumtë në rrugët e Durrësit, duke shijuar qytetin, ushqimin dhe vizituar monumentet dhe objektet e trashëgimisë kulturore të qytetit. Interesi për historinë dhe pasurinë arkeologjike të Durrësit konfirmohet edhe nga shifrat e vizitorëve, të cilat këtë vit kanë shënuar rritje të ndjeshme.
Në 9 muajt e parë të vitit, monumentet historike dhe Muzeu Arkeologjik janë vizituar nga 53 610 persona, 21,5% më shumë krahasuar me të njëjtën periudhë të vitit të kaluar.
Sipas Qendrës Muzeore Durrës, rritja e numrit të vizitorëve është reflektuar edhe në të ardhurat nga biletat, të cilat kanë arritur në 13.8 milionë lekë, me një rritje prej 44.2% në raport me janar-shtatorin e vitit 2025.
Rihapja e Muzeut Arkeologjik në prill ka nxitur më tej interesin për thesaret historike të qytetit, ndërsa Amfiteatri Antik vijon të jetë monumenti më i vizituar, duke mbetur një nga pikat kryesore të itinerarit turistik.
Shifrat tregojnë se trashëgimia kulturore e Durrësit po shndërrohet gjithnjë e më shumë në një arsye për të vizituar qytetin, edhe përtej sezonit tradicional turistik.
Ndërkaq mozaiku antik, simbol i qytetit, “Bukuroshja e Durrësit” vazhdon të mos jetë i ekspozuar në muze.
©ZëriOnline
