Donald Trump mund të hapë dokumente të tjera të qeverisë amerikane për sulmet terroriste të 11 Shtatorit 2001.
Presidenti i SHBA-së ka deklaruar se do të shqyrtojë kërkesën e familjeve të viktimave, të cilat kërkojnë prej vitesh publikimin e materialeve që vazhdojnë të jenë të klasifikuara ose të paaksesueshme për publikun.
Trump e bëri deklaratën gjatë qëndrimit në Irlandë, përpara kthimit në Uashington. Familjet kërkojnë që administrata amerikane të publikojë dokumente, raporte dhe materiale të tjera nga arkivat shtetërore që lidhen me hetimet për 11 Shtatorin.
Një nga çështjet për të cilat ato kërkojnë më shumë informacion lidhet me kontaktet që rrëmbyesit mund të kenë pasur me persona ose struktura jashtë Shteteve të Bashkuara.
Vëmendja është përqendruar prej vitesh edhe tek Arabia Saudite. Nga 19 rrëmbyesit që morën kontrollin e katër avionëve më 11 shtator 2001, 15 ishin shtetas sauditë.
Disa familje të viktimave kanë pretenduar se persona të lidhur me qarqe fetare ekstremiste në Arabinë Saudite mund t’u kenë dhënë ndihmë disa prej rrëmbyesve.
Këto pretendime nuk provojnë përfshirjen e shtetit saudit në organizimin e sulmeve. Qeveria e Arabisë Saudite ka mohuar vazhdimisht çdo përfshirje.
Autoritetet amerikane kanë deklasifikuar dhe publikuar ndër vite një pjesë të dokumenteve për sulmet e 11 Shtatorit, por materiale të tjera vazhdojnë të mos jenë të aksesueshme për publikun.
Trump nuk ka njoftuar ende se cilat dokumente mund të publikohen. Ai ka deklaruar se do të shqyrtojë kërkesën e familjeve, ndaj vendimi për hapjen e materialeve të tjera mbetet ende për t’u marrë.
©ZëriOnline
