Gjykata liron 18 protestues në Durrës, 4 mbeten në arrest shtëpie (Emrat)

Përqafime, lot dhe thirrje për të mos u tërhequr nga protesta. Kështu u prit në Durrës vendimi i Gjykatës për 22 protestuesit e arrestuar të enjten, në ditën e parë të përplasjeve me policinë.

Pas seancës së zhvilluar këtë të diel, 18 prej tyre u lanë të lirë nga qelia, me masën “detyrim për t’u paraqitur në policinë gjyqësore”, ndërsa katër të tjerë do të qëndrojnë në arrest shtëpie.

Dalja e protestuesve nga gjykata u shoqërua me emocione dhe përqafime nga familjarët e mbështetësit e mbledhur jashtë institucionit. Mes tyre, pati edhe deklarata për vijimin e protestës, pavarësisht arrestimeve dhe përplasjeve të ditëve të fundit.

Gjykata vlerësoi të ligjshëm arrestimin në flagrancë të 22 personave, ndërsa caktoi masa të ndryshme sigurie. Ata janë nën hetim për dyshime që lidhen me pjesëmarrjen në grumbullime të paligjshme, kundërshtimin e policisë, prishjen e qetësisë publike dhe dëmtimin e pronës. Për disa prej tyre, dyshimet përfshijnë edhe shkatërrimin e pronës me zjarr.

Por vendimi për masat e sigurisë nuk i ka shuar polemikat për mënyrën e ndërhyrjes së policisë. Avokatët mbrojtës kanë ngritur pretendime për dhunë fizike ndaj protestuesve gjatë arrestimit dhe shoqërimit në komisariat, çështje për të cilat kërkohet sqarim.

Lirimi i 18 protestuesve vjen pas tri ditësh protesta në Durrës, të shoqëruara me përplasje, dëmtime dhe shoqërime në polici. Ndërsa katër të tjerët do të qëndrojnë në banesë, mes protestuesve mbetet e fortë thirrja për vijimin e tubimeve.

Procedimi penal ndaj personave nën hetim vijon, ndërsa masa e sigurisë nuk përbën vendim përfundimtar mbi fajësinë e tyre.

Arrest në shtëpi (4 protestues)

1. Must Lleshi
2. Meraldo Tufina
3. Sabah Kurbalaj
4. Glajdi Dosku

Detyrim për t’u paraqitur në policinë gjyqësore (18 protestues)

1. Albert Nasufi
2. Ronaldo Delija
3. Pjetër Pjetri
4. Daniel Pjetri
5. Artenis Kaja
6. Kristi Mëmaj
7. Albert Martini
8. Klajvi Brahaj
9. Marjel Troci
10. Ermal Tartari
11. Orest Berberi
12. Enkel Zika
13. Fatmir Krasniqi
14. Klejdi Hoxha
15. Ilis Cela
16. Ferdinand Gjini
17. Ndrec Pjetri
18. Enri Maliqati

©ZëriOnline