Gjykata Kushtetuese ka vendosur të kalojë në seancë gjyqësore kërkesën e Partisë Demokratike, e cila kundërshton procedurën e ratifikimit në Kuvend të marrëveshjes së huasë ushtarake prej 302 milionë dollarësh ndërmjet Shqipërisë dhe Shteteve të Bashkuara të Amerikës.
Partia Demokratike e ka dërguar çështjen në Gjykatën Kushtetuese, duke pretenduar se Kuvendi nuk ka respektuar kërkesat kushtetuese gjatë miratimit të marrëveshjes.
Opozita ka sqaruar se kundërshtimi i saj nuk lidhet me përmbajtjen e marrëveshjes apo me bashkëpunimin ushtarak me Shtetet e Bashkuara, të cilat përbëjnë aleatin strategjik të Shqipërisë, por me procedurën parlamentare që shumica ndoqi për ratifikimin e saj.
Sipas PD-së, mënyra e miratimit të marrëveshjes ka cenuar rregullat kushtetuese, ndaj partia kërkon që Gjykata Kushtetuese të vlerësojë ligjshmërinë kushtetuese të procedurës.
Me vendimin për kalimin e çështjes në seancë gjyqësore, Gjykata Kushtetuese do të shqyrtojë pretendimet e opozitës dhe do të përcaktojë nëse Kuvendi ka vepruar në përputhje me Kushtetutën gjatë ratifikimit të marrëveshjes.
©ZëriOnline
