Është shtyrë seanca gjyqësore në Apelin e Posaçëm për ish-drejtoreshën e Shërbimit Informativ të Shtetit, Vlora Hyseni, e cila ka ankimuar masën e sigurisë “Arrest në shtëpi”.
Shkak për moszhvillimin e seancës është bërë mungesa e prokurorëve të çështjes, të cilët, së bashku me kolegë nga SPAK dhe GJKKO, kanë marrë pjesë në ceremonitë mortore për nënën e prokurorit Sotir Kllapi, e cila është ndarë nga jeta.
Për këtë arsye, shqyrtimi i ankimit është shtyrë për të martën, më 3 nëntor, në orën 13:00.
Përveç Hysenit, masat e sigurisë i kanë ankimuar edhe Embro Sulejmani dhe Fatjon Kalluçi.
Sulejmani, menaxher i agroturizmit “Kodra e Kuajve”, dyshohet për veprën penale të përkrahjes së autorit të krimit, ndërsa Kalluçi, përgjegjës sektori në Institutin e Policisë Shkencore, është nën hetim për zbulim të akteve ose të dhënave sekrete.
Ish-drejtoresha e SHISH-it iu drejtua Apelit të Posaçëm pa kaluar ende një javë nga ndalimi i saj, duke kundërshtuar masën e sigurisë të vendosur ndaj saj.
Vlora Hyseni është nën hetim për veprat penale të përkrahjes së autorit të krimit dhe nxjerrjes së sekretit shtetëror.
Në seancën e radhës, Apeli i Posaçëm pritet të shqyrtojë ankimet e paraqitura ndaj masave të sigurisë.
