Një ngjarje e rëndë është shënuar në familjen Kaçuli, në fshatin Rrushkull të Manzës, në Durrës, ku një 37-vjeçar dyshohet se ka dhunuar fizikisht prindërit e tij të moshuar.
Ngjarja ka ndodhur përballë banesës së familjes, ku E. K., 37 vjeç, i cili sipas policisë ka probleme të shëndetit mendor, ka goditur me sende të forta të atin, 72 vjeç, dhe të ëmën, 69 vjeçe.
Si pasojë e dhunës, të dy prindërit kanë marrë dëmtime dhe janë transportuar në spital. Nëna ndodhet në Spitalin Rajonal të Durrësit, në gjendje të stabilizuar, ndërsa babai, i cili ka pësuar dëmtime në kokë, është në gjendje të rëndë shëndetësore dhe është nisur drejt Spitalit të Traumës në Tiranë për trajtim të specializuar.
Ndërkohë, 37-vjeçari është shoqëruar në polici. Grupi hetimor, nën drejtimin e Prokurorisë, po punon për zbardhjen e plotë të rrethanave dhe dokumentimin e ngjarjes.
