Shtohen rastet e qytetarëve që paraqiten në Spitalin Rajonal të Vlorës me simptoma të të vjellave dhe diarresë. Problematika ka prekur banorë të lagjeve “28 Nëntori” dhe “29 Nëntori”, mes tyre fëmijë dhe të rritur.
Pacientët kanë marrë serum dhe trajtim mjekësor, më pas janë kthyer në banesa, pa pasur nevojë për shtrim në spital.
Dyshimet përqendrohen te furnizimi me ujë të pijshëm, pasi rastet kanë dalë në pah pas një ndërhyrjeje riparimi në rrjetin e ujësjellësit dhe rikthimit të furnizimit.
Nga analizat e kryera, në dy mostra uji është konstatuar mungesë klori, ndërsa në disa të tjera parametrat kanë rezultuar brenda normave.
Ky konstatim ngre pikëpyetje për kontrollet dhe dezinfektimin e ujit pas ndërhyrjes në rrjet. Ndërmarrja e ujësjellësit dhe autoritetet shëndetësore duhet të sqarojnë nëse kanë garantuar cilësinë e ujit përpara rikthimit të furnizimit.
