Nga Edmond Arizaj
Ajola Xoxa mund të ketë të drejtë. Ndoshta për dhjetë vjet ajo, sipas kontabilistëve të saj ka shpenzuar për veshje e mbathje diku 75 mijë euro dhe jo 800 e kusur mijë. Problemi nuk qëndron nëse i ka apo jo mundësitë ajo t’i blejë, nuk qëndron problemi i kanë lënë apo jo trashëgim të parët. Ky është problem me drejtësinë.
Me njerëzinë është problemi se zonja është bashkëshorte e kryetarit të bashkisë, e njeriut të parë të kryeqytetit, e përfaqësuesit të shtresës së varfër e të mësme, e mbrojtësit dhe solidarit të të margjinalizuave.
Është bashkëshorte e njeriut modest që shkon në punë me biçikletë, që ka shitur fiq, që i është futur politikës me një pulovër, që shpërndan supë. Bashkëshorti, kryetar bashkie, nuk vjen nga derë e pasur, (për dreq gjithë meshkujt politikanë shqiptarë janë të varfër, por gratë i kanë zgjedhur të pasura), ndaj shfaqjet me veshje firmato, me bizhu e ngrefosje, jo vetëm nga zonja Xoxa në fakt, janë një karshillëk i rëndë për masën e madhe të shqiptarëve…
Edhe nëse kontabilistët nuk kanë gabuar rastësisht, 75 mijë euro vetëm porosi online për trupin, janë njëherë e gjysëm sa një kredi për shtëpi që 80 përqind e çifteve të reja shqiptare e kanë të pamundur ta marrin, e ata që e marrin duhet ta shlyejnë në 15-25 vjet.
Politika për aktivistët që hyjnë në të të varfër, është si puna e xhindit, të jep fuqi të pakufijshme, por ama duart t’i lidh pas llambës, sepse nëse nis e llamburit nga veshja e bizhutë pasi je ngritur në pushtet, paragjykimi është problemi më i vogël, hetimi është problemi normal, dhe përballja i vetëm i me drejtësinë është problemi më i madh.
Kur në politikë hyn modestisht nga pasuria, të paktën publikut familjarisht duhet t’i tregohesh modest. Nuk është vetëm zonja Xoxa kaq vanitoze të kuptohemi. Është e gjithë arradha e atyre që mbysin ekranet “të firmosur” e që kushtojnë me shifra pesë shifrore (në euro) nga koka tek këmbët. Vetëm për një ditë. Kontrasti është aq i fortë sa të nxjerr sytë, ndaj dhe justifikimet apo mbrojtja duhej mbajtur larg syve e veshëve të publikut.
Nëse thua që harxhoj në vit 7500 euro për rroba e bizhuteri, dhe je ndërkohë bashkëshortja e njeriut që firmos leje ndërtimi dhe menaxhon buxhetin më të madh të vendit, çfarë pret të mendojë dikush që aq para vetëm i ëndërron familjarisht?! Modesti, përulje dhe pendesë, kjo mungon nga politikanët e familjarët e tyre i të gjitha krahëve, në një nga vendet më të varfëra të Europës, vendi ynë.
PS: Zonja Xoxa ka të drejtë kur ankohet për suljen dhe vërsuljen në media e rrjete sociale. Karma dihet se ç’është! Por mund të imagjinohet se sa e sa të tjerëve u janë sulur madje pa pasur faj. Dhe ata s’kishte as kush i mbronte.
