Nuk i “dorëzohet” drejtësisë, por vijon të sulmojë SPAK-un.
Pas vendimit të Apelit të Posaçëm që la në fuqi vendimin e GJKKO-së, kryebashkiaku i arrestuar Erion Veliaj ka reaguar përmes një mesazhi publik, ku e cilëson këtë proces si një padrejtësi dhe sulm të qëllimshëm ndaj tij.
Ai shprehet se vendimi nuk ishte ai që do të kishte dëshiruar, por ai që kërkonin ata që e shohin si një armik të betuar.
Në mesazhin e tij, ai flet për një “kurth” të ngritur ndaj tij, duke përmendur përgjimet e bisedave me gruan dhe vëllain nga burgu, të cilat, sipas tij, janë shndërruar në një dosje të re. Veliaj e krahason këtë situatë me një “ëndërr të keqe” ose një “film sovjetik”, ku sigurimi ndjek individin deri në poshtërim. Megjithatë, ai shton se nuk është as ëndërr dhe as film, por një realitet i dhimbshëm.
Duke përmendur avokatin amerikan të siguruar nga vëllai i tij, Veliaj deklaroi se Joshua Roberts nuk arrinte të kuptonte arsyet e arrestimit të tij. Po ashtu, ai tregon se i është drejtuar Inspektorit të Lartë të Drejtësisë, por e krahason këtë veprim me një letër në shishe të hedhur në det, pa e ditur nëse do të marrë ndonjë përgjigje.
Pavarësisht situatës, Veliaj thekson se nuk e konsideron këtë si fundin e betejës së tij dhe premton se do të vazhdojë luftën për drejtësi deri në fund.
©️zërionline
