Diferenca e çmimit dhe rritja e fitimit nxisin rastet e kontrabandës nê pikat kufitare dhe jo vetëm në vend.
Një sasi prej rreth 1.2 tonë nafte e futur kontrabandë nga Kosova është sekuestruar nga Policia Kufitare në Kukës, ndërsa drejtuesi i automjetit që e transportonte është arrestuar në flagrancë.
Operacioni u zhvillua nga shërbimet e Policisë Kufitare të Drejtorisë Vendore për Kufirin dhe Migracionin Kukës, në kuadër të monitorimit të kufirit jeshil për parandalimin e krimeve ndërkufitare.
Gjatë kontrolleve në rrugën rurale Pakisht-Kukës, policia ndaloi një furgon që drejtohej nga shtetasi V. S., 39 vjeç, banues në Kolesian, Kukës. Pas verifikimeve, rezultoi se në brendësi të furgonit ndodhej rreth 1.2 tonë naftë e futur në mënyrë të paligjshme nga Kosova, jashtë pikave të kalimit kufitar dhe shërbimeve doganore.
Sasia e naftës u sekuestrua në cilësinë e provës materiale, ndërsa drejtuesi i mjetit u arrestua për veprat penale “Kontrabandë me mallra që paguhet akcizë” dhe “Kalim i paligjshëm i kufirit shtetëror”.
Policia Kufitare vijon hetimet për të identifikuar persona të tjerë të përfshirë në këtë aktivitet të paligjshëm.
©️zërionline
