Nuk duhet të jesh lider, mjek apo sipërmarrës për të ndier djegien emocionale. Lodhja e brendshme po prek gjithnjë e më shumë njerëz të zakonshëm, në heshtje.
Në fillim është vetëm një ndjenjë e lehtë lodhjeje që nuk të largohet. Më pas, çdo mëngjes bëhet më i rëndë. Dita kalon mes detyrash që i kryen pa shumë vullnet. Dhe në fundjavë, kur më në fund ke pak kohë për veten, nuk ke as energji për të shijuar ato pak orë liri. Kjo është djegia emocionale, por ajo që nuk flitet shpesh është forma e saj e heshtur, që prek njerëz të zakonshëm, jashtë profesioneve që shoqëria i sheh si “stresuese”.
Shumë njerëz, veçanërisht gratë që mbajnë barra të shumta, prindërit e rinj, punonjësit në punë rutinë apo të papaguara mjaftueshëm, vuajnë në heshtje. Ata nuk ankohen, nuk kërkojnë ndihmë, dhe shpesh ndihen në faj që nuk janë “mirënjohës” për atë që kanë.
5 sinjalet që tregojnë se mund të jesh në djegie emocionale (burnout):
1. Lodhje e vazhdueshme, pavarësisht sa shumë pushon.
2. Humbje e motivimit edhe për gjërat që dikur të kënaqnin.
3. Vështirësi në përqendrim, harresë apo konfuzion në mendime.
4. Irritim i shpeshtë për gjëra të vogla.
5. Ndjesia e boshllëkut dhe pyetjet e brendshme si “përse e bëj gjithë këtë?”
Pse ndodh?
Një ndër shkaktarët kryesorë është mungesa e ndarjes midis kohës së punës dhe asaj personale. Puna online, kërkesat e larta sociale dhe presioni për të qenë gjithmonë “në formë” kanë çuar drejt një lodhjeje të brendshme që akumulohet ngadalë. Po ashtu, mungesa e të kuptuarit të disa prej aktiviteteve të përditshme luan një rol të madh.
5 hapa të vegjël për të ndihmuar veten:
1. Ndaj kohë të paprekshme për veten çdo ditë, edhe nëse janë vetëm 15 minuta.
2. Thuaj “jo” pa ndjerë faj, kur diçka e tejkalon kapacitetin tënd emocional.
3. Zgjidh një aktivitet që të qetëson, si leximi, piktura apo ecja.
4. Hiq dorë nga të bërit shumë gjëra dhe bëj një gjë me vëmendje të plotë.
5. Bëj një bisedë të sinqertë me dikë që të kupton, pa ndjerë nevojën të justifikohesh.
Të rikuperosh veten nuk është luks, është nevojë.
Të shtunat mund të jenë një pikënisje. Jo si ditë për të “arritur më shumë”, por si ditë për të mos bërë asgjë, ose vetëm ato pak gjëra që të mbushin shpirtin.
©️zërionline
