Ndërsa vendi i afrohet kulmit të fushatës zgjedhore, Prokuroria e Përgjithshme ka zbuluar një panoramë shqetësuese. Deri më 28 prill janë regjistruar 14 kallëzime penale që lidhen drejtpërdrejt me procesin zgjedhor. Nga pengimi i subjekteve politike, te kërcënimet ndaj pjesëmarrësve në zgjedhje dhe përdorimi i pushtetit për qëllime elektorale, shkeljet kanë nisur të lënë gjurmë që në këtë fazë paraprake të garës.
Sipas të dhënave zyrtare, kallëzimet janë regjistruar në disa prokurori vendore, me Fierin që mban vendin e parë me pesë raste. Saranda, Tirana dhe Gjirokastra ndjekin me nga disa procedime, ndërsa Durrësi dhe Elbasani kanë regjistruar nga një rast secila.
Veprat penale që dominojnë janë: “Pengimi i subjekteve zgjedhore”, “Dëmtimi me dashje i materialit zgjedhor”, “Përdorimi i funksionit publik për veprimtari politike” dhe “Kanosja apo dhunimi ndaj pjesëmarrësve në zgjedhje”. Procedimet janë hapur në bazë të nenit 325 e deri tek neni 329 i Kodit Penal, duke treguar një spektër të gjerë shkeljesh që, sipas ekspertëve të së drejtës, nuk duhen nënvlerësuar.
Burimet e kallëzimeve janë gjithashtu të ndryshme. Shtatë prej tyre kanë ardhur nga policia gjyqësore, tre nga SPAK, dy nga vetë subjektet politike, ndërsa një rast është nisur kryesisht nga prokuroria dhe një tjetër nga një qytetar.
Deri tani, janë hapur shtatë procedime penale, pesë prej të cilave në Fier. Ato përfshijnë raste të rënda si pengim i fushatës së kandidatëve dhe përdorimi i funksionit shtetëror për qëllime politike. Dy procedime të tjera janë regjistruar në Gjirokastër, për vepra që përfshijnë dëmtim të materialeve zgjedhore dhe pengim të procesit.
I vetmi kallëzim nga Durrësi dhe një procedim nga Fieri i janë kaluar për kompetencë SPAK-ut. Ndërkohë, pjesa tjetër e kallëzimeve ndodhet ende në fazën e verifikimit.
Prokuroria i bën thirrje aktorëve politikë dhe administratës të respektojnë ligjin, ndërsa opinioni publik pret që fushata të mos mbulohet nga hijet e frikës, presionit apo abuzimit me pushtetin. Të dhënat e para janë një sinjal paralajmërues se procesi zgjedhor kërkon vigjilencë të shtuar dhe reagim institucional të menjëhershëm.
©️zërionline
