Shpesh thuhet se “të gjitha nisin nga koka”, dhe kjo nuk vlen vetëm për mendimet apo emocionet. Shkenca moderne ka zbuluar se truri dhe aparati tretës janë të lidhur ngushtë, në një mënyrë që ndikon drejtpërdrejt në shëndetin tonë fizik e mendor.
Truri dhe zorrët, një “autostradë” nervore
Sipas specialistëve të shëndetit, ekziston një bosht i fuqishëm komunikimi mes trurit dhe zorrëve, i quajtur “boshti tru-zorrë” (brain-gut axis), ku mesazhet qarkullojnë në të dy drejtimet. Ky sistem përfshin rrugë nervore, kryesisht nervin vagus, por edhe hormone dhe baktere të dobishme të florës intestinale.
Kjo do të thotë se gjendja emocionale, si stresi, ankthi apo depresioni, mund të ndikojnë direkt në funksionimin e stomakut dhe zorrëve. Prandaj, shumë njerëz përjetojnë shqetësime si dhimbje barku, fryrje apo tretje të dobët në periudha të ngarkuara mendërisht.
Çfarë ndodh kur stresi “sulmon” stomakun?
– Stresi kronik rrit sekretimin e acideve të stomakut, duke nxitur gastritin apo refluksin.
– Ndikon në lëvizjen e zorrëve, duke shkaktuar diarre ose kapsllëk.
– Ndryshon balancën e mikrobiotës (baktereve të dobishme), duke ulur imunitetin.
– Redukton prodhimin e enzimeve tretëse, çka e bën më të vështirë përthithjen e ushqyesve.
Zorrët: “truri i dytë” i trupit
Jo më kot zorrët quhen “truri i dytë”. Ato përmbajnë miliona neurone dhe prodhojnë rreth 90% të serotoninës, hormonit të mirëqenies. Pra, një sistem tretës i shëndetshëm ndikon jo vetëm në ushqyerje, por edhe në gjendjen tonë emocionale.
Çfarë mund të bëjmë për të ruajtur balancën?
Të menaxhojmë stresin përmes teknikave relaksuese si meditimi, joga apo aktiviteti fizik.
Të konsumojmë ushqime të pasura me fibra dhe probiotikë, që ndihmojnë florën bakteriale.
Të shmangim kafenë, alkoolin dhe ushqimet pikante në periudhat me stres të lartë.
Të flasim me një mjek kur shqetësimet vazhdojnë, pasi ato mund të jenë simptomë e sëmundjeve më serioze.
Nëse deri dje ndarja mes trupit dhe mendjes ishte e prerë, sot shkenca po e provon të kundërtën. Truri flet me zorrët dhe zorrët ndikojnë tek mendja.
Kjo lidhje është një kujtesë e fuqishme se shëndeti i plotë kërkon qetësi mendore dhe kujdes të përditshëm ndaj trupit.
©️zërionline
