Një aksident rrugor është shënuar mëngjesin e sotëm në Fier, në vendin e njohur si “Ura e Sheqit”, ku një autobus i linjës urbane Fier–Libofshë është përplasur me një automjet të policisë bashkiake.
Sipas informacioneve paraprake, drejtuesi i autobusit dyshohet se ka humbur kontrollin dhe i ka prerë rrugën mjetit të policisë bashkiake, duke sjellë përplasjen mes dy mjeteve. Si pasojë e aksidentit, autobusi ka devijuar nga rruga dhe është përplasur me murin rrethues të një ish-kompleksi tregtar.
Burime lokale bëjnë me dije se disa persona kanë mbetur të lënduar lehtë, mes tyre edhe pasagjerë të autobusit. Të lënduarit janë transportuar me urgjencë në Spitalin Rajonal të Fierit dhe ndodhen jashtë rrezikut për jetën.
Në vendngjarje kanë mbërritur forcat e policisë dhe grupi hetimor, të cilët po punojnë për të përcaktuar shkaqet e sakta të aksidentit dhe për të ndërtuar dinamikën e përplasjes.
Autoritetet rrugore bëjnë apel për kujdes të shtuar nga drejtuesit e mjeteve, sidomos në orët e mëngjesit kur qarkullimi është më i dendur dhe aksidentet ndodhin më shpesh.
Hetimet vijojnë.
©️zërionline
