Ministria e Arsimit dhe Sportit ka reaguar pas publikimit të tezës së provimit të gjuhës së huaj, sapo kishte nisur procesi në të gjitha qendrat e testimit në vend. Në një deklaratë për mediat, MAS siguron maturantët, prindërit, mësuesit dhe opinionin publik se ky akt i papërgjegjshëm nuk ndikon në rrjedhën e procesit dhe nuk cënon integritetin e Maturës Shtetërore 2025.
“Provimi i parë i Maturës Shtetërore, ai i gjuhës së huaj, po zhvillohet në përputhje të plotë me rregulloren në fuqi dhe në kushte maksimale sigurie dhe transparence. Procesi është i garantuar për 27 mijë maturantë në të gjithë Shqipërinë dhe po zbatohet me standardet më të larta të testimit”, – thuhet në reagimin zyrtar të MAS.
Ministria dënon me forcë çdo përpjekje për të dëmtuar besueshmërinë e procesit, duke theksuar se fotografimi dhe publikimi i tezës pasi ka nisur provimi nuk e zbeh punën e palodhur të mësuesve, administratorëve dhe strukturave arsimore në të gjithë vendin.
“Matura Shtetërore është ndërtuar mbi një sistem të konsoliduar kontrolli dhe mbikëqyrjeje, që përfshin hartimin e testeve me siguri të plotë, përgatitjen e stafit administrativ, testet model, para-testimet dhe mbështetjen psikologjike për maturantët”, thekson më tej MAS, duke shtuar se janë forcuar edhe elementët teknikë të administrimit, si kamerat e sigurisë dhe standardet e hyrje-daljeve.
Ndërkohë, maturantët e pyetur pas përfundimit të provimit shprehen të lehtësuar nga mbyllja e provimit të parë dhe të kënaqur me ecurinë e tij.
“Provimi ishte i një shkalle mesatare vështirësie. Kishte pyetje të pritshme dhe të përballueshme për këdo që është përgatitur. Për të tjerë mund të konsiderohet i vështirë”, – tha një maturante në Durrës.
Edhe në qytete të tjera, nxënësit e intervistuar u shprehën se testi ishte i drejtë dhe i ndërtuar mbi temat e trajtuara gjatë vitit shkollor. Po për nxënës të tjerë, niveli ishte më shumë se B2. Pjesa më e madhe e tyre vlerësuan organizimin dhe kushtet në ambientet e provimit, si dhe mbështetjen nga mësuesit dhe stafi administrativ.
Për Ministrinë e Arsimit dhe Sportit, prioritet i panegociueshëm mbetet suksesi i çdo maturanti dhe garantimi i së drejtës për të zhvilluar provimin në kushte të barabarta, ndërsa angazhimi për një proces të drejtë dhe të ndershëm do të vijojë gjatë gjithë periudhës së Maturës Shtetërore 2025.
©️zërionline
