Brigjet e Durrësit janë kthyer në një skenë reale të manovrave ushtarake, ku forcat shqiptare, rajonale dhe ato amerikane po zhvillojnë një nga stërvitjet më të rëndësishme ndërkombëtare: “Defender Europe 2025”. Me një skenar kompleks dhe pjesëmarrje mbresëlënëse, Gjiri i Durrësit është “pushtuar” nga anije luftarake, helikopterë Kugar dhe dronë monitorues që simulojnë një operacion të sofistikuar ndërhyrjeje detare.
Në thelb të këtij demonstrimi ishte një incident i simuluar, ku forcat detare shqiptare dhe amerikane ndërhynë ndaj një anijeje të dyshuar që po largohej nga ujërat territoriale pa leje. Në bordin e anijes shqiptare “Oriku”, përfaqësues të mediave ndoqën nga afër koordinimin e veprimeve të pesë anijeve pjesëmarrëse, tre shqiptare dhe dy amerikane, në një skenar që zhvillohej rreth 6 milje larg bregut.
Skena të denja për një film aksion u panë në qiellin dhe ujërat e Durrësit, ku helikopterët Kugar kryen zbarkime taktike, ndërsa një dron patrullues kontrollonte gjithçka nga lart. Operacioni u përfshi në një zinxhir ndërveprimi të sinkronizuar, ku çdo lëvizje shërbente për të testuar kapacitetin reagues dhe bashkëpunimin ndërkombëtar.
Komandanti i Forcës Detare bëri të ditur se stërvitje të tilla zhvillohen çdo dy vjet dhe “Defender Europe” është pjesë e një nisme të gjerë të Komandës Detare të SHBA për Evropën dhe Afrikën. Qëllimi është i qartë, të forcohet aftësia e forcave të NATO-s për të vepruar në kushte reale, duke përdorur kanalet ajrore, tokësore dhe detare për të mbrojtur linjat strategjike të komunikimit dhe infrastrukturën kritike.
Në këtë aspekt, roli i Shqipërisë është kyç. Përveç mbrojtjes së linjave detare dhe objektivave të rëndësishëm si gazsjellësi TAP apo sistemet nënujore të komunikimit, në fokus është edhe siguria e infrastrukturës portuale. Forcat speciale amerikane janë gjithashtu të pranishme në këtë mision të përbashkët.
Stërvitja, e cila do të zgjasë deri më 9 qershor, bazohet në Nenin 5 të Traktatit të NATO-s, një angazhim i përbashkët për mbrojtjen kolektive në rast të ndonjë sulmi ndaj një vendi anëtar. Në këtë kontekst, “Defender Europe 2025” është një mesazh i qartë për gatishmërinë dhe forcën e aleancës në mbrojtje të paqes dhe sigurisë në rajon.
Ndërkohë, përveç Shqipërisë, edhe Kosova do të jetë pjesë e skenarëve të stërvitjes, ku do të zhvillohen trajnime për mbrojtjen e infrastrukturës kritike, sigurimin e pikave të imbarkimit dhe menaxhimin e logjistikës së avancuar, elementë jetikë për çdo përgjigje të menjëhershme ndaj kërcënimeve të mundshme.
Durrësi është kthyer në një pikë strategjike ku ndërthuren teknologjia, taktikat moderne dhe partneriteti ushtarak, një provë e gjallë se siguria globale nis nga bashkëpunimi konkret në terren.
©️zërionline
