Me fillimin e kampionatit europian, vënia e basteve në lokale të ndryshme ka nisur të aktivizohet sërish. Gjatë kontrolleve në Kavajë dhe në Durrës, policia ka goditur këtë fundjavë dy raste të veprimtarive të jashtëligjshme të lojërave të fatit. Dy persona, përkatësisht 18 dhe 54 vjeç, u arrestuan në Kavajë dhe në Manëz të Durrësit, për veprën penale “Organizim ose ushtrim të veprimtarive të lojërave të fatit në kundërshtim me ligjin”, ndërsa pronari i lokalit në Kavajë u procedua penalisht për veprën “vënie në dispozicion të lokaleve për lojëra të palejuara”.
Ndonëse më 1 prill ka hyrë në fuqi zyrtarisht ligji “Për lojërat e fatit në Republikën e Shqipërisë, arrestimet vazhdojnë. Sipas burimeve policore, në të dyja rastet subjektet ishin të palicensuara dhe e ushtronin vënien e basteve në mënyrë të kundraligjshme. Ligji parashikon rikthimin e basteve sportive vetëm në formën online, me qëllim formalizimin e tregut të lojërave të fatit, duke licencuar subjekte të cilat plotësojnë kriteret dhe kanë eksperiencë në ushtrimin e aktivitetit baste sportive.
@źërionline
*Ripublikimi i materialeve tona lejohet vetëm nëse bëhet citimi i autorit, burimit origjinal.
