Rriten kursimet e shqiptarëve të Kosovës. Sipas Bankës Qendrore të Kosovës (BQK), 6 miliardë euro kanë të depozituara në bankat vendore të nivelit të dytë shtetasit e Kosovës. Referuar të dhënave të BQK-së, rritja për muajin shkurt është prej 12.3 milionë Euro, ose 0.2 %, krahasuar me muajin paraprak.
“Nga vlera e akumuluar e depozitave të klientëve rreth 26.6% janë të afatizuara. Sipas sektorëve, ekonomitë familjare dominojnë me rreth 67.5% të gjithsej vlerës së depozitave (rreth 4.1 miliardë euro)”, shkruhet në raportin e Bankës.
Në muajin shkurt 2024, vlera e depozitave të reja ishte 78.7 milionë euro, ndërsa norma mesatare e interesit ishte 2.89 %. Krahasuar me muajin paraardhës norma mesatare e interesit është rritur duke nxitur depozitimet. Në janar 2024, ajo ka qenë 2.74%. Ndërkaq, për të njëjtin muaj, vlera e kredive bruto ka qenë 4.95 miliardë.
©zërionline
