Kënaqësi, natyrë, histori dhe aktualitet. Një lojë e fortë ngjyrash, peisazhesh dhe shtigjesh që gjarpërojnë drejt bregdetit përmes një bimësie të harlisur. Këto dhe shumë më tepër: histori që vjen që nga antikiteti, monumente të trashëgimisë kulturore mbi dhe nën ujë, gojëdhëna me perëndi ilire, zhvillime mesjetare dhe kujtesë e mëpasshme historike ofrohen plot bujari nga Kepi i Rodonit. Natyra dhe thirrja për pak paqe, qetësi të fton për të udhëtuar drejt Kepit, që mban emrin e hyut, perëndisë ilire të detit, Redonit, apo Rodonit. Mitologjia vjen e përjetësuar në këtë Kep që ndodhet vetëm 49 km larg Durrësit dhe 58 km larg Tiranës. Dikur vendbanim ilir e më pas pjesë e principatës së Topiajve dhe e rrethit të Durrësit, Kepi i Rodonit është sot në territorin e njësisë administrative Ishëm të bashkisë Durrës. Përveç rrugës tokësore, këtu mund të mbërrish dhe përmes asaj detare falë një skele të portit të lashtë që ende është funksionale. Për ata që janë më të përgatitur fizikisht dhe në kërkim të adrenalinës, udhëtimi me biçikletë në Kep është fantastik, plot aventurë, të papritura që e gjithë zona ofron.
@zërionline
*Ripublikimi i materialeve tona lejohet vetëm nëse bëhet citimi i autorit, burimit origjinal.
