Dy vëllezër në kërkim për plagosjen e një 43-vjeçari nga Rrogozhina. Ai u plagos me armë zjarri mbrëmjen e së dielës në Luz të Vogël të Kavajës, kurse policia identifikoi si autorë të dyshuar dy vëllezërit nga ky fshat, përkatësisht 26 dhe 32 vjeç, që janë shpallur në kërkim nga policia. Shërbimet e saj po punojnë për kapjen e tyre dhe të një personi të tretë, shokut të tyre, që ka qenë bashkë me ta në momentin e konfliktit mes njërit prej vëllezërve dhe të plagosurit. Nuk dihet ende cili prej të treve ka qëlluar mbi 43-vjeçarin, duke e plagosur në këmbë.
Sipas policisë vendore, ngjarja ndodhi gjatë një konflikti që dyshohet për motive të dobëta. Palët kanë kontaktuar fillimisht në telefon dhe e kanë lënë për t’u sqaruar për një “problem” në Luz të Vogël ku konflikti ka vijuar me fyerje dhe tregim force të tipit “kush je ti e kush jam unë”.
I plagosuri ndodhet në spital jashtë rrezikut për jetën. Shërbimet e policisë po vijojnë punën për kapjen e të dyshuarve dhe grupi hetimor, nën drejtimin e prokurorisë, po punon për sqarimin dhe dokumentimin e plotë ligjor të ngjarjes.
@zërionline
