Një 70-vjeçar nga Lapraka humbi jetën pasi pësoi arrest kardiak këtë të enjte sapo hyri në det teksa po pushonte në plazhin e Durrësit. Ngjarja ndodhi rreth orës 10:15, ndërsa pushuesit e tjerë u përpoqën t’i japin ndihmën e parë pa sukses. Ndërkohë, grupi hetimor ka mbërritur në vendngjarje dhe po vijon punën për sqarimin e plotë të rrethanave të ngjarjes.
Kjo është një tragjedi e ngjashme me atë të ndodhur dhjetë ditë më parë, kur një 66-vjeçar nga fshati Lekaj i Kavajës humbi jetën në plazhin e Spillesë në rrethana të njëjta. Ai gjithashtu pësoi arrest kardiak sapo hyri në ujë. Hetimet për të dyja rastet janë ende në vazhdim për të kuptuar më mirë shkaqet dhe rrethanat e këtyre fatkeqësive, ndërsa mjekët bëjnë thirrje për kujdes të shtuar tek moshat e treta dhe të sëmurët kronikë pasi ndryshimi i menjëhershëm i temperaturës nga qëndrimi në diell te kalimi në ujë sjell aritmi dhe arrest kardiak, shpesh fatal.
@zërionline
