Ministrja e Brendshme e Gjermanisë, Nancy Faeser, ka ndaluar publikimin e revistës Compact, duke e konsideruar një “zëdhënëse të skenës ekstremiste të djathtë”. Edhe kompania botuese e saj Conspect Film GmbH është ndaluar.
Policia ka bastisur zyrat e revistës në Falkensee, afër Berlinit, si dhe shtëpitë e menaxherëve kryesorë dhe aksionerëve në Brandenburg, Hesse, Saksoni dhe Saksoni-Anhalt për të konfiskuar pasuri dhe prova, deklaroi ministria e Brendshme.
“Kjo revistë nxit urrejtje kundër hebrenjve, kundër njerëzve me histori migracioni dhe kundër demokracisë sonë parlamentare në një mënyrë të pamëshirshme,” tha ministrja Faeser.
Compact është një revistë mujore politike drejtuar nga kryeredaktori Jürgen Elsässer, i cili shpesh nxit audiencën e tij në ngjarje me slogane si “Amerikanët shkojnë në shtëpi” dhe “Miqësi me Rusinë.”
Sipas hetimeve, figurat kryesore të revistës mbajnë kontakte me figura të rëndësishme të skenës ekstremiste të djathtë. Në dyqanin e saj online, revista ofron një monedhë me imazhin e Björn Höcke, një politikan i zjarrtë nga partia e djathtë Alternative for Germany (AfD) i cili së fundmi u dënua dhe gjobit sërish për përdorimin e një slogani të ndaluar nazist.
Shërbimi i inteligjencës së brendshme të Gjermanisë, i njohur si Zyra për Mbrojtjen e Kushtetutës, e klasifikoi Compact si një botim të provuar ekstremist të djathtë në fund të vitit 2021, duke thënë se revista përhap qëndrime “anti-demokratike dhe çnjerëzore.”
Faeser tha se ndalimi tregon “se ne po ndërmarrim veprime edhe kundër zjarrvënësve intelektualë që po nxisin një klimë urrejtjeje dhe dhune kundër refugjatëve dhe migrantëve dhe duan të përmbysin shtetin tonë demokratik.”
Për të ndaluar një organizatë në Gjermani, nuk mjafton që ajo të propagandojë një qëndrim anti-kushtetues, por duhet ta bëjë këtë në një mënyrë agresive dhe militante.
Në deklaratën e saj, Ministria e Brendshme përmendi frikën se lexuesit dhe shikuesit e përmbajtjes së Compact mund të nxiten dhe inkurajohen për të kryer akte anti-kushtetuese. Publikimet e Compact “propagandojnë në mënyrë agresive përmbysjen e rendit politik,” tha ministria e brendshme gjermane. /dpa
©️zërionline
*Ripublikimi i materialeve tona lejohet vetëm nëse bëhet citimi i autorit, burimit origjinal.
