Prokuroria në Durrës ka njoftuar mbrëmjen e së premtes mbi përparimin e procedimit penal për mbetjet dhe ekzekutimin e urdhrit të sekuestros për konteinerët e ndaluar. Në bashkëpunim me institucionet e ngarkuara për zbatimin e urdhrit të sekuestros, të lëshuar më 27 tetor 2024, po zhvillohet faza e fundit e këtij procesi të ndërlikuar.
Për shkak të natyrës komplekse të çështjes – duke përfshirë volumin dhe llojin e materialeve të sekuestruara dhe nevojën për siguri të lartë mjedisore e fizike – institucionet kanë njoftuar prokurorinë mbi masat e marra deri më tani, ndërkohë që anija e ngarkuar me konteinerët vijon të monitorohet në radë nga Policia e Shtetit.
Prokuroria e Durrësit ka kërkuar gjithashtu mbështetjen e Fakultetit të Gjeologjisë dhe Minierave, Fakultetit të Shkencave të Natyrës dhe Agjencisë Kombëtare të Burimeve Natyrore për ofrimin e laboratorëve dhe ekspertizës së nevojshme për analizimin e materialeve të sekuestruara.
Duke marrë parasysh interesin e lartë publik, Prokuroria e Durrësit deklaroi se do të vazhdojë të informojë opinionin publik mbi hapat e ardhshëm të këtij procesi.
©️zërionline
