Pas stuhisë së një dite më parë që përfshiu qytetin e Durrësit, situata atmosferike ka shënuar përmirësime të dukshme, duke bërë të mundur rinisjen e lundrimeve. Mëngjesin e kësaj të shtune, dy tragetet e linjës Durrës-Bari, të cilat anulluan nisjet natën e kaluar për shkak të kushteve të këqija atmosferike, u nisën rreth orës 08:00. Gjithashtu, edhe tragetet që vijnë nga Bari drejt Durrësit kanë rifilluar lundrimet.
Sipas kapitenit të portit të Durrësit, Tauland Allka, era që fryn nga veriu ka një shpejtësi prej 10 m/s, duke shkaktuar dallgëzim 5 ballë. Parashikimet për mbrëmjen e sotme tregojnë se era do të ndryshojë drejtim nga verilindja dhe forca e detit pritet të bjerë në 3 ballë, duke kthyer plotësisht normalitetin në lundrimet në detin Adriatik.
Nga dita e diel e në vazhdim, do të rinisë edhe aktiviteti i anijeve të peshkimit, të cilat kanë pezulluar prej disa ditësh gjuetinë për shkak të motit të keq. Përmirësimi i kushteve atmosferike do të rikthejë ritmet normale të veprimtarive detare në zonë.
©️zërionline
