Një operacion policor i koduar “Storm” organizuar në Durrës nga policia goditi një grup kriminal që shfrytëzonte gra kineze për prostitucion nê zonën e plazhit. Pas një hetimi njëmujor me metoda proaktive nga Sektori për Hetimin e Trafiqeve të Paligjshme, në bashkëpunim me Prokurorinë e Durrësit, operacioni u zhvillua në lagjen nr. 13, Plazh, duke çuar në pranga një anëtar të grupit, ndërsa dy organizatorë janë shpallur në kërkim dhe 7 gra kineze janë proceduar penalisht.
Në kuadër të këtij operacioni u arrestua në flagrancë Guangtai Lin, 50 vjeç, lindur në Kinë, i dyshuar për “Shfrytëzim prostitucioni”.
Procedimi penal nisi për 7 gra kineze për veprën penale “Prostitucioni”, ndërsa u shpallën në kërkim Guangcheng Lin, 47 vjeç, një prej organizatorëve kryesorë të grupit, dhe Yanxia Zhang, 45 vjeçe, menaxhere e grupit, për “Trafikim të qenieve njerëzore”.
Hetimet zbuluan se ky grup i strukturuar kriminal rekrutonte gra nga Kina dhe, përmes kontakteve në Vietnam, i sillte në Shqipëri për t’i shfrytëzuar për prostitucion. Pasi mbërrinin në Shqipëri, grupi siguronte apartamente dhe automjete me qira për zhvillimin e aktivitetit.
Grupi përfaqësohej në Shqipëri nga Guangcheng Lin, i cili menaxhonte dhe kontrollonte financiarisht aktivitetin. Të ardhurat nga prostitucioni transferoheshin tek Yanxia Zhang, e cila jeton në Bahrein. Hetimet tregojnë se 25% e fitimeve përvetësohej nga ajo, 35% i kalonte organizatorëve në Vietnam, ndërsa 40% shkonin si pagë për gratë e rekrutuara.
Gjatë operacionit, policia sekuestroi shuma parash të përfituara nga prostitucioni, 13 celularë, 1 laptop, një fletore me shënime mbi fitimet financiare, si dhe sendet të tjera që lidhen me aktivitetin e paligjshëm.
Materialet procedurale i janë dorëzuar Prokurorisë për hetime të mëtejshme.
©️zërionline
