Një vajzë 12-vjeçare nga Sukthi ka ndërruar jetë në Spitalin Rajonal të Durrësit, pasi pësoi një hemorragji cerebrale të dyshuar si pasojë e një aneurizmi.
Sipas informacionit zyrtar nga drejtoria e spitalit, e mitura u transportua me autoambulancë nga Sukthi në orën 09:30, duke shfaqur kriza konvulsive. Deri në orën 10:30, ajo u trajtua në urgjencën pediatrike dhe më pas u transferua në pavionin përkatës. Mjekët kërkuan të kryenin një rezonancë magnetike të kokës, por kjo nuk u bë e mundur për shkak të konvulsioneve të përsëritura. E mitura u trajtua nga një mjek neuropediatër për të kontrolluar krizat dhe temperaturën, e cila arriti deri në 38.5°C. Pas një stabilizimi të pjesshëm, rreth orës 16:00, pacientja u dërgua për të kryer skanerin e kokës, i cili, pavarësisht artefakteve nga lëvizjet, evidentoi hemorragjinë cerebrale.
Menjëherë pas diagnozës, reanimatorët morën në kujdes të miturën, e cila u intubua për shkak të rënies së vlerave të oksigjenit. Pavarësisht përpjekjeve të stafit mjekësor, gjendja e saj u përkeqësua vazhdimisht, duke çuar në ndërrimin e jetës rreth orës 18:30.
Mjekët dyshojnë se hemorragjia cerebrale mund të jetë shkaktuar nga një aneurizëm i pashfaqur më parë, megjithatë një konfirmim i saktë për shkakun e vdekjes pritet pas ekzaminimeve të mëtejshme mjeko-ligjore.
©️zërionline
