Është identifikuar autori i shpërthimit me eksploziv të lokalit të Bledar Talit, në Fushë Krujë, më 31 janar. Në njoftimin zyrtar policia sqaron se është autori është identifikuar si Mondi Topalli, ndërsa po punohet për kapjen e tij. Lidhur me këtë ngjarje është proceduar penalisht edhe babai i Topallit, pasi nga kontrolli në banesë, iu gjet 1 armë gjahu dhe municion luftarak që mbaheshin pa leje.
“Si rezultat i hetimeve të kryera me qëllim zbardhjen e autorësisë dhe rrethanave të dëmtimit me lëndë plasëse, të fasadës së lokalit, në Fushë Krujë, kryer në orët e para të mëngjesit të datës 31 janar, shërbimet e Komisariatit të Policisë Krujë identifikuan dhe shpallën në kërkim autorin e dyshuar të rastit, shtetasin 41 vjeç. Nga kontrolli në banesën e tij, në fshatin Tapizë, u konstatua se babai i 41-vjeçarit, mbante pa leje, 1 armë gjahu dhe municion luftarak. Ndaj tij nisi procedimi në gjendje të lirë, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe mbajtja pa leje e armëve të gjuetisë dhe sportive”, thuhet në njoftimin e policisë. Materialet procedurale iu referuan Prokurorisë së Tiranës, për veprime të mëtejshme.
©️zërionline
