Kandidatja për Primaret e Partisë Demokratike në Qarkun Durrës, Jola Hysaj, ka bërë thirrje për mbështetjen e anëtarëve të PD-së në zgjedhjet që do të zhvillohen më 1 mars. Me një angazhim politik prej gati 20 vitesh, ajo thekson se ka qenë gjithmonë në shërbim të parimeve të demokracisë dhe lirisë.
“Nuk jam një emër i panjohur për ju, sepse jam rritur dhe formuar në këtë parti, duke ndarë me ju sfidat dhe betejat për një Shqipëri më të drejtë,” shprehet Hysaj.
Duke kujtuar rrugëtimin e saj politik nga anëtare e thjeshtë e PD-së, te nënkryetare e Forumit Rinor në Durrës, anëtare e Këshillit Kombëtar dhe sot Sekretare për Marrëdhëniet me Publikun në Partinë Demokratike të Shqipërisë, Hysaj thekson se angazhimi i saj është një betejë për dinjitet dhe të drejta.
Ajo deklaron se vjen nga një familje me histori dhe sakrifica, e rritur me vlerat e besimit në Zot dhe me kujtimet e padrejtësive që kanë përjetuar familjet e saj, Metalla dhe Ballanca, si të përndjekura nga regjimi i kaluar.
“Sot, Shqipëria ka nevojë për një ndryshim të vërtetë. Ka nevojë për një politikë me dimension njerëzor, që e vendos qytetarin në qendër dhe jo interesat personale e klienteliste. Ky është misioni im,” thekson ajo.
Me numrin rendor 19, Jola Hysaj kërkon mbështetjen e demokratëve për të qenë zëri i qytetarëve në Parlament, duke u angazhuar për një Shqipëri me më shumë mundësi për të gjithë dhe një Durrës që zhvillohet me dinjitet.
“Më 1 mars vendosni për një politikë ndryshe! Votoni për guxim! Votoni për ndryshimin! Votoni Jola Hysaj! Votoni 19!” përfundon ajo, duke ftuar demokratët e Durrësit, Shijakut, Krujës dhe Fushë-Krujës t’i bashkohen vizionit të saj për të ardhmen.
Në listën e primareve të PD-së për qarkun Durrës janë 37 kandidatë, mes të cilëve edhe figura me kontribut të gjatë në këtë forcë politike, e cila prej vitesh ndodhet në opozitë dhe synon të marrë pushtetin pas zgjedhjeve të 11 majit.
©️zërionline
