Pas transmetimit të rastit në emisionin “Stop”, Policia e Durrësit arrestoi 51-vjeçarin Skënder Kurti, i cili kërcënonte me jetë djalin e tij, Xhemal Kurti. Ky i fundit, në vitin 2024, u dënua me 1.5 vite burg pasi u vetëmbrojt nga sulmi i të atit duke e goditur me një tullë.
Familja Kurti nga fshati Shkafane i Durrësit, është përballur me dhunë dhe abuzim për vite me radhë. Vajza e kësaj familjeje e denoncoi të atin në Itali për abuzim seksual, gjë që çoi në dënimin e tij me 7 vite burg. Pas deportimit në Shqipëri, ai vijoi dhunën dhe përndjekjen ndaj familjes.
Xhemali, tashmë 19 vjeç, rrëfen se i ati ka qenë gjithnjë i dhunshëm, duke terrorizuar të ëmën dhe fëmijët e tij. Përplasja e fundit ndodhi kur Xhemali vizitoi gjyshen dhe u përball me të atin, i cili e sulmoi fizikisht. Duke mos pasur rrugëdalje, i riu u vetëmbrojt me një tullë, por për këtë përfundoi në burg për 3 muaj.
Pas daljes nga burgu, Xhemali ka mbetur i pastrehë dhe i papunë, duke u përballur ende me përndjekjen e të atit. Ai tregon se edhe në vendin e punës është kërcënuar nga njerëz të botës së krimit të dërguar nga i ati.
Historia e familjes Kurti pasqyron një realitet të dhimbshëm të dhunës në familje dhe sfidave të viktimave për të gjetur drejtësi dhe mbrojtje.
©️zërionline
